Anboto mendiko mendilerroak, Durangaldeko Harriak izenez ere ezagunak, mendi-paisaia ikusgarri bezain ikonikoa osatzen du, neurri berean ederra eta historiaz betea. Urkiolako Parke Naturalaren magalean Mañaria udalerria dago mendeetako harrobien ustiapenagatik ezaguna, besteak beste.'Mugarra eta Errialtabaso tontorren arteko enklabe batean, Angurretakoa erabili gabeko harrobia da, eta hirurogeita hamarreko hamarkadaren hasiera arte marmol itura eta tonu grisaxkako kareharrizko barietate bat atera zen bertatik, "Mañaria gris" ezizenez merkaturatu zena. Harrobia artisau eran ustiatu zen, burdinazko hariz ebakitako harrizko bloke handiak erauziz, eta barnealdeen estaldurarako erabiltzen ziren, batik bat. 16.000 metro koadroko meatze-ustiapen zahar hau, arbola hostotsuz inguratua, gune kultural eta artistiko berritu bihurtu da orain, Víctor Arrizabalaga artistari eta Angurreta Harrobia Kultur Elkarteari esker. Bertan, praktika artistiko garaikideak ingurumenarekiko eta baliabide naturalekiko begirunearekin uztartu nahi dira. Ahantzitako lur-eremu honek bere ingurunearen dibulgazio geologiko eta antropologikorako gela gisa ere balio du.